Burgu politik me Nr. 13 ndodhej në lagjen “Kala”, në një ndërtesë të trashëguar si burg nga koha e luftës. Ka funksionuar në vitet 1944-1953. Por shërbente si burg edhe një ndërtesë tjetër në shtëpinë e familjes Bishqemi. Sipas të dhënës nga Divizioni i Mbrojtjes së Popullit, burgjet e Elbasanit në vitin 1946 ishin në dy nivele:
–Burgu i Armiqve të Popullit, ku shërbente një personel prej 29 vetash (26 ushtarë, 2 nënoficerë, 1 oficer).
– Burgu i Strehuesve, ku shërbente një personel prej 10 vetash (9 ushtarë, 1 nënoficer).
Besohet se veç tyre, burgu ordiner ka pasur Numrin 12.
Të burgosurit kanë ndërtuar kanalin ujitës “Naum Panxhi”, në vitin 1947, çfarë tregon që të dënuarit e tij kanë qenë pjesë edhe e një prej kampeve të para të përkohshme të punës.
Kapaciteti i burgut ishte për rreth 280 persona.
Në vitin 1950 në burg janë rreth 500 të burgosur.
Në Burgun e Elbasanit mbizotëronin sëmundje si TBC-ja, dizenteria etj.
Burgu u mbyll në shkurt 1953, pasi të burgosurit e tij formuan kampin nr. 7 në Tiranë.
Komandantët dhe drejtorët e burgut ishin të profesioneve: bujk dhe xhandar. Arsimi bazë i tyre ishte 4 klasë fillore.